Transcription

La fleur de la science de pourtraicture, Et patrons de broderie, facon arabicque et ytalique. Cum privilegio regis.

Censuyt le privilege

Françoys par la grace de dieu roy de France. Aux prevost et bailly de Paris, ou ses lyeutenans et a tous nos autres iusticiers salut et dilection. Receue avons lhumble supplication de notre cher et bien ame Francisque Pelegrin de Florence contenant que pour toujiours decorer, publier, et acoustre L’art et science de pourtraicture. Et avec grand peine et labeur fait invente et compose ung livre de fueillages, entrelatz et ouvraiges moresques et Damasquins leq(ue)l il defireroit Voule(n)tiers faire imprimer et mettre en lumiere et evide(n)ce Si cestoit nostre Plaisir le luy permettre et octroyer. Et aussi aya(n)t par nous regard quil est premier inventeur. Intendire et Deffendre a to(us) autres libraires de notre royaulme de non imprimer ny faire imprimer led livre sur peine de co(n)fiscation et amende. Scavoir faisons q(ue) no(ous) ce co(n)sidere Voulans et desirans la co(m)prehencion de tous arts licites et honestes estre excerce en notre d. royaulme. Avo(n)s donne, octroye et permis, Donons, octroyo(n)s et permettons par ces p(re)sentes au d. pelerin; quil puisse faire imprimer par telz Libraires que bon luy semblera dedict livre Durant le temps et terme de Six ans prochains et consecutifz de la Dacte (de l’) impression dudict livre Sa(n)s ce quil soit loysible ne permis a nulz autres libraires de nostre dict royaulme imprimer ny faire imprimer icelluy livre Dura(n)t led te(m)ps Sur peine de lame(n)de et confiscation desditz livres qui se trouverroyent avoir este par eulx imprimez. Si vous mandons et a ch(acun) de vous sicomme a luy appartie(n)dra Que de nos presens Don, octroy, et permission Vous faictes souffrez et laissez ledict pelegrin iouyr et user plainement et paisiblement Durant lesdict temps sans aucun arrest ou empescheme(n)t a ce contraire. Car tel est notre plaisir. Do(n)n a Bordeaulx le xvii. iour de Juing. Lan de grace mil cinq cens tre(n)te. Et de nostre regne le seiziesme.

Par le Roy a vostre relation. Barrillon.

Le present livre a ester Imprime a paris par Jacques Nyverd. le iv. iour Daoust. lan de grace mil cinq ce(nt)s vvv. Pour noble ho(m)me messier francisque pelegrin. De florence.

On les vend à Paris dans la grant rue Saint Anthoyne devant les tournelles au Logis de Monseigneur le comte de Carpes.  Par Mesire Francisque Pellegrin de Florence.