---

2 transcripted pages

---

Chapter 1 Page 1

Die Chronyk van Hollandt, Zeelandt ende Vriesland, beghinnende van Adams tyden, tot die geboerte ons Heren Jhesu, voortgaende tot den jare M.CCCCC ende XVII. Met den rechten oerspronc, hoe Hollandt eerst begrepen ende bewoent is gheweest van den Troyanen. Ende is inhoudende van die hertogen van Beyeren, Henegouwen ende Bourgongen; die tijt dat si ant graefscap geweest hebben; met die cronike der biscoppen van Uutrecht, seer suverlic geextendeert ende int lange verhaelt.

---

Chapter 1 Page 2

Copie.
Kaerle, by der gracien Goeds Coninck van Castillen, van Leon, van Grenaden, van Arragon, van Naverre, van beyde den Sicilien, van Jherusalem, van Valence, van Majorcke, van Sardene, van Corsice (a), etcetera, eertshertoge van Oestenrijcke; hertoge van Bourgongen, van Lothrinck, van Brabant, van Stiere, van Crayn, van Carmole, van Lemburch, van Lutzenburch ende van Ghelre, grave van Vlaenderen, van Habsburch, van Tyrol, van Artoys, van Bourgongen palsgrave ende van Henegauwe; lantgrave van Elsaten; prince van Swaven; marcgrave van Burgau ende des Heylichs Rijcs; van Hollant, van Zeelant, van Phirt, van Kiborch, van Namen ende van Zutphen grave; here van Vrieslant, van den Windesmarck, van Portenaw, van Salins ende van Mechelen. Allen denghenen die desen onsen brief sullen sien: Saluyt! Vanwegen ons beminden Jan Cornelis zoen, alias Jan Zeversoen, printer, wonende binnen onser stede van Leyden, is ons verthoent gheweest, hoe dat gaerne imprimeren ende in printe leggen soude dit teghenwoerdige boeck, ende is een Cronijcke van Hollant; ende also hem datselve costelick ende moyelic vallen sal, ende dat ditselve boeck noyt gheprint en is gheweest, soe en soude hi dieselve printe ende impressie niet durren bestaen sonder te hebben brieven van octroye ende privilegie van ons, om ditselve boeck te moghen imprimeren ende printen binnen ses toecomende jaren, ende dat nyemende gheoerloft en si dan hem allene, om dieselve impressie te moghen doen, ons oetmoedelick biddende hem dieselve brieven te willen gonnen ende verlenen in goeder vormen. Soe eyst, dat wi desen, angesien sonderlinge dat dit Boeck ende volumen voorscreven noyt gheimprimeert ofte gheprint en is gheweest, wi hebben den voornoemden Janne Cornelissoen om dese ende andere redenen ons daertoe porrende, in den ghevalle als boven, genegen wesende tot sijn voorscreven bede ende begeerte, gegonnen, geoctroyeert ende gewillekoert, gonnen, octroyeren ende willekueren, hem ghevende oerlof, auctoriteyt ende expres privilegie uut sonderlinge gracie, midts desen onsen brieve, dat hi dit boeck ende voluymen voren verclaert sal mogen imprimeren ende printen ofte doen imprimeren ende printen tallen tiden alst hem goet duncken sal, te wetene dye Cronycke van Hollandt, behoudelic dat hi ghehouden sal wesen dieselve prente ende impressie volmaect ende volbracht te hebben binnen vier jaren naest comende; binnen welcken tijde van vier jaren nyemant, wie hi si, dan denselven thoonder gheoerloft noch gheauctorizeert en sal wesen dieselve prente ende impressie van den voorscreven boecke ende voluymen te mogen doen, opte verboerte van denselven boecken, die bi yemant anders dan dieselve thoonder gheprent soude wesen, ende daer of arbitraerlick ghestraft ende gecorrigeert te sine. Ontbieden daerom ende bevelen onsen lieven ghetrouwen Cancelier ende luyden van onsen Secreten Rade, President ende luyden van onsen Groten Rade, Cancelier ende luyden van onsen Rade in Brabant, President ende luyden van onser camere van den Rade in Vlaenderen; Stedehouder, President ende luden van onsen Rade in Hollant; scout van Leyden ende allen anderen onsen Rechteren, Justicieren ende Officieren, wien dit angaen mach, heren stedehouderen ende elcken van hem bysonder, soe hem toebehoren sal, dat si den voornoemden Jan Cornelis zoen, suppleant, doen laten ende gedogen van deser onser gracie, octroye ende previlegie, ende van al den inhouden van deser, duerende den tijt ende in der voegen ende manieren voren verhaelt, rustelic, vredelic ende volcomelic ghenyeten, sonder hem te doen ofte laten geschien enich hinder, letsel ofte moyenesse ter contrarien. Straffende die overtreders van dien byder peynen voorscreven, sonder verdrach oft dissimulacie, want ons also belieft. Des toerconden hebben wi onsen zegel hieran doen hangen. Gegeven in onser stat van Bruessel, den neghenden dach van october int jaer ons Heeren duysent vijf hondert ende sestien, ende van onsen Rijcke deerste.

By den Coninc in sinen Hogen Rade. Hanneton onderteykent.

(a) Corfice AB.




Transcription by: drs. A. de Hamer, http://resources.huygens.knaw.nl/retroboeken/divisiekroniek/